විශේෂාංග

ලෝකෙම ඉල්ලන - කංසා ඉල්ලම

ලෝකෙම ඉල්ලන – කංසා ඉල්ලම

කංසා වගා කිරීම සහ කංසා ශාකයෙන් වැඩ ගැනීම පිළිබඳව ඉතා සාර්ථක කතිකාවක් මේ වනවිට සමාජය පුරා පැතිරෙයි. පාර්ලිමේන්තු මන්ත්‍රීනි ඩයනා ගමගේ කිහිප වතාවක්ම කංසා නීතිගත කිරීම පිළිබඳව පාර්ලිමේන්තුවේදී අදහස් දැක්වූ අතර දේශීය වෙදකම් ප්‍රවර්ධන, ග්‍රාමිය හා ආයුර්වේද රෝහල් සංවර්ධන හා ප්‍රජා සෞඛ්‍ය රාජ්‍ය අමාත්‍ය සිසිර ජයකොඩි අපනයනය සඳහා පමණක් කංසා නීති සංශෝධනය කරන බව පැවසීය. අන්තර්ජාතික කංසා පුනර්ජීවනය සමග සම්බන්ධ වීමට බලාපොරොත්තු වන ශ්‍රී ලංකාව අවධානය යොමුකළ යුතු පැතිකඩ කිහිපයක් පිළිබඳව මෙම ලිපියෙන් සාකච්ඡා කෙරේ.

වර්තමානයේදී කංසා බහුකාර්ය කෘෂිකාර්මික බෝගයක් ලෙස හඳුන්වයි. ලොව පුරා දියුණු රටවල කංසා වගා කර එයින් ලබාගන්නා ඇට, මැලියම, පොතු, කඳ සහ මුල් භාවිත කර ආහාර, ආහාරමය තෙල්, ඖෂධ, රෙදිපිළි, ලණු, කඹ, ගොඩනැගිලි ද්‍රව්‍ය, සත්ත්ව ආහාර, කඩදාසි, ප්ලාස්ටික්, ආස්වාදය සපයන දුම්වැටි, බියර්, වයින් ආදිය මෙන්ම ඉන්ධන ද නිෂ්පාදනය කරයි.

චීනය, ජපානය, කොරියාව, ඉන්දියාව, ඊශ්‍රායලය, ජර්මනිය, ඉතාලිය, චෙකොස්ලෝවැකියාව, හංගේරියාව, ප්‍රංශය, එංගලන්තය, උරුගුවේ, ඇමරිකාව, කැනඩාව, ඔස්ට්‍රේලියාව, නවසීලන්තය සහ නෙදර්ලන්තය වැනි රටවල් රැසක් කංසා ශාකයෙන් දැවැන්ත වාසි ලබා ගනියි. දියුණුම රටවලට භූමි සහ පාරිසරික තත්ත්ව අවශ්‍ය තරම් නැති නිසා සමකය අසල ඇති අප්‍රිකානු සහ ආසියානු රටවල් සමග සමබන්ධ වී අවශ්‍ය කංසා වගා කර ගනියි. උදාහරණයක් ලෙස ඉන්දියාවේ රාජ්‍ය කංසා නිෂ්පාදන ආයතනය කටයුතු කරන්නේ ජර්මනිය සමගය. මේ වනවිට ඊශ්‍රායලය, කැනඩාව, ඇමරිකාව, ජපානය වැනි රටවල් රැසක් ශ්‍රී ලංකාව සමග කංසා වගා කිරීමේ ව්‍යාපෘති සඳහා සම්බන්ධ වීමට කැමැත්තෙන් සිටී.

කංසා භාවිත කළ හැකි දේශීය කර්මාන්ත

ශ්‍රී ලංකාවේ තිබෙන ප්‍රධාන කර්මාන්ත එනම් නිමි ආහාර, ආහාරමය තෙල්, ඖෂධ, ලණු, කඹ, ගොඩනැගිලි ද්‍රව්‍ය, සත්ත්ව ආහාර, කඩදාසි, ආස්වාදය සපයන දුම්වැටි, බියර්, වයින් ආදිය නිෂ්පාදනය කරන ආයතනවලට කංසා ශාකයේ අමුද්‍රව්‍ය ඉතාම පහසුවෙන් භාවිත කළ හැකිය. එහෙත් නූල් විවීම, CBD තෙල් නිස්සාරණය, ප්ලාස්ටික් සහ ඉන්ධන නිෂ්පාදනය සඳහා අවශ්‍ය කර්මාන්ත ශාලා සහ තාක්ෂණය තවම අප සතුව නැත.

ශ්‍රී ලංකාවේ දැනට තිබෙන සියලු නිමි ආහාර නිෂ්පාදකයන්ට කංසා ඇටවලින් ලබා ගන්නා පිටි සහ තෙල් භාවිත කළ හැකිය. තවද කංසා ශාකයෙන් ලබා ගන්නා CBD නමැති ඖෂධීය රසායනය අතිරේක පෝෂක පදාර්ථයක් ලෙස එකතු කළ හැකිය. කඩදාසි නිෂ්පාදනය කරන ආයතනවලට අවශ්‍ය වන සෙලියුලෝස් සහිත තලපය කංසා ශාකයේ තන්තුවලින් සාදා ගත හැකිය.

පිළිකාකාරක දුම්කොළවලින් දුම්වැටි සාදන ආයතනවලට කංසා මල් සහ පත්‍ර ආධාරයෙන් සෞඛ්‍යට හානි නොකරන, ඖෂධීය ගුණ ඇති, ආනන්දය සහ ආස්වාදය ලබාදෙන දුම්වැටි නිෂ්පාදනය කළ හැකිය. මේ සඳහා දුම්කොළ වගා කිරීම ක්‍රමයෙන් අඩුකර ඒ වෙනුවට ඖෂධීය කංසා දුම්වැටි සෑදීම සඳහා සුදුසු කංසා ප්‍රබේද වගා කළ යුතුය. මද්‍යසාර නිෂ්පාදනය කරන ආයතනවලට අවශ්‍ය ආනයනික එතනෝල් වෙනුවට කංසා ඇට පැසවීමට ලක් කර ලබා ගන්නා එතනෝල් භාවිත කළ හැකිය. එමගින් අපට අවශ්‍ය එතනෝල්වලින් කොටසක් හෝ නිපදවා ගත හැකි වනු ඇත.

මේ වන විට ලොව පුරා පැතිර යන නවතම තේ පානය බවට පත් වී ඇත්තේ කංසා තේ ය. එබැවින් තේ සඳහා සුදුසු කංසා ප්‍රභේද වගා කිරීම ආරම්භ කළ යුතුය. ප්ලාස්ටික් නිසා සිදු වී ඇති පාරිසරික ගැටලු නවතා දැමීමට ලෝකයේ දියුණුම රටවල් මේ වනවිට භාවිත කරන විකල්පය වන්නේ කංසා තන්තුවලින් ප්ලාස්ටික් භාණ්ඩ නිෂ්පාදනය කිරීමයි. සත්ත්ව ආහාර නිෂ්පාදනය කරන ආයතනවලට කංසා ඇට සහ ඇටවලින් තෙල් හිඳගත් පසු ඉතිරි පුන්නක්කු භාවිත කළ හැකිය.

කංසා ශාකයේ ශක්තිමත් අරටුව කුඩා කොටස්වලට කඩා හුනු සමග මිශ්‍රකර බ්ලොක්ගල් නිෂ්පාදනය කළ හැකිය. මේ සඳහා සිමෙන්ති හෝ වැලි අවශ්‍ය නොවන බැවින් පරිසර හිතකාමි ඉතා ලාබදායි ක්‍රමයකි. තවද කංසා අරටු කැබැලිවලින් තුනී ලෑලි සහ ප්ලයිවුඩ් වැනි දැව තහඩු නිර්මාණය කළ හැකිය. තුනී ලෑලි සංස්ථාවේ මේ සඳහා අවශ්‍ය තාක්ෂණය සහ උපකරණ ඇත. දේශීය සහ බටහිර ඖෂධ නිෂ්පාදනය කරන ආයතනවලට කංසා මල් කිනිති, මුල් සහ කොළ භාවිත කර ඖෂධ නිෂ්පාදනය ආරම්භ කළ හැකිය.

දැනට ශ්‍රී ලංකාවේ තිබෙන කර්මාන්ත රැසකට අවශ්‍ය මූලික අමුද්‍රව්‍ය ලබා දීමට කංසා ශාකයට හැකි බව ඉහත කරුණුවලින් පෙනී යයි. කංසා වගා කර එයින් ලබා ගත හැකි අමුද්‍රව්‍ය භාවිතය ආරම්භ කිරීම තුළින් පිටරටට ඇදී යන දැවන්ත මුදල් සම්භාරයක් ඉතිරි කර ගත හැකිය. ලෝකයේ දියුණුම රටවලත් මේ වනවිට නීති සකස් කරගෙන විපුල ප්‍රයෝජන ගන්නේ සියලුම කර්මාන්ත සඳහා අවශ්‍ය අමුද්‍රව්‍ය සපයා දීමට කංසා ශාකයට හැකි බැවිණි.

කංසා මැලියමේ ගුණ

මෙහි මුලින් සඳහන් කළ THC ශරීර ගත වූ පසු මොළය, සුෂුම්නාව, පර්යන්ත ස්නායු පද්ධතිය, තැලමස, හයිපොතැලමස, පිටියුටරිය, තයිරොයිඩ් ග්‍රන්ථිය, නාස් කුහර, අක්මාව, ඇඩ්රිනලින් ග්‍රන්ථිය ගර්භාශය, පුරස්ථි ග්‍රන්ථි සහ වෘෂණකෝෂ තුළ ඇති ස්නායු සෛලවල සිනැප්ටික් පෙර අන්තයේ ඇති සුවිශේෂ රසායනයක් සමග සම්බන්ධ වී ජෛව රසායනික ක්‍රියා මාලාවක් ආරම්භ කර එම ඉන්ද්‍රියවල කාර්යක්ෂමතාව වැඩි කරයි.

තවද කංසා මැලියමේ ඇති CBD නමැති රසායන ශරීර ගත වූ පසු අක්ෂි, හෘදය, ආමාශය, අග්න්‍යාශය, ආහාර මාර්ගය, අස්ථි, වසා පද්ධතිය, ප්‍රතිශක්තිකරණ පද්ධතිය, ප්ලිහාව, තයිමස, ටොන්සිල්ස් සහ චර්මය වැනි ඉන්ද්‍රිය තුළ ඇති ස්නායු සෛලවල සිනැප්ටික් පෙර අන්තයේ ඇති සුවිශේෂ රසායනයක් සමග මෙන්ම රතු රුධිර සෛල සහ ලිම්පෝසයිට්වල ඇති එම සුවිශේෂ රසායනය සමග සම්බන්ධ වී ජෛව රසායනික ක්‍රියා මාලාවක් ආරම්භ කර මෙම ඉන්ද්‍රිය සහ පටකවල කාර්යක්ෂමතාව වැඩි කරයි.

කංසා තහනම

ඕලන්ද ජාතිකයන් යටතේ ශ්‍රී ලංකාව පාලනය වූ යුගයේ වසර 1867 දී කංසා භාවිතය පාලනය කිරීම පිණිස පළමු අණපනත් එකතු විය. ඉන්පසු බ්‍රිතාන්‍ය ජාතිකයන් වසර 1929 දී සහ 1935 දීත් නිදහස ලැබීමෙන් පසු ශ්‍රී ලංකා රජය වසර 1984 දීත් කංසා භාවිතය සම්පූර්ණයෙන්ම තහනම් කිරීම පිණිසත් නව සංශෝධන ඇති කළේය.

ජනවිඥානය

ඒ සමගම කංසා සම්බන්ධ පාරම්පරික දැනුම සහ ක්‍රමවේද ගිලිහුනු අතර අවසානයේදී අසත්‍යයම විශ්වාස කරමින් කංසා ශාකයට ගරහන ජනසමාජයක් බිහි විය. මේ සමගම කංසා වගාවේ මූලික න්‍යාය වූ විවිධ ප්‍රබේද වෙන් වෙන්ව වගා කිරීමද නතර විය. ඒ සමග උස සහ මිටි ප්‍රබේද එකම වගා බිමකට සීමා විය. මේ අතර ඇති වූ ජාන මුහුම් වීම නිසා විවිධ කංසා ප්‍රබේද 20ක් පමණ බිහි වී ඇති බව අධ්‍යනවලින් හෙළි විය. ඉතා උස සහ මිටි අතර පරාසයක කංසා ප්‍රබේද ඇති බවත් ඒවායෙහි පුෂ්ප මංජරියේ ස්වභාවයෙන් විවිධ ප්‍රබේද හඳුනාගත හැකි බවත් විවිධ ප්‍රබේදවලට අනුකූල වූ ආනන්දයක් සහ ආශ්වාදයක් ඇති බවත් ජනවිඥානය තුළ අන්තර්ගතය.

ජනවිඥානයට අනුව වැඩිපුරම කංසා ප්‍රබේද තිබෙන්නේ සියඹලාආණ්ඩුව ප්‍රදේශයේය. එයට හේතුව ඔවුන්ගේ වගාබිම්වලදී පිරිමි ගස් ඉවත් නොකිරීමය. තවද ඔක්කම්පිටිය, තණමල්විල, තිස්සමහාරාමය සහ මහියංගණය වැනි ප්‍රදේශවලට ද ආවේණික ප්‍රබේද ඇති බව දැනගන්නට ඇත. සිටුවා දින 45ක් පමණ කාලයක් ගතවන විට විවිධ ප්‍රබේද අතර ඇති වෙනස්කම් දැක ගත හැකිය.

කාබනික වගාවේ ආරම්භය

කංසා ශාකයට ආවේණික රසායනවලට කෘමීන් සහ ක්ෂුද්‍රජීවින් විකර්ෂණය කළ හැකි බැවින් වෙනත් බෝගවලට මෙන් කංසා ශාකයට කෘමී හෝ දිලීර හානි සිදු වන්නේ නැත. එබැවින් කංසා වගාවට කෘමි නාශක සහ දිලීර නාශක අවශ්‍ය වන්නේ නැත. කංසා ශාකය වේගයෙන් වැඩෙන නිසා වල් පැළෑටි පරදා වර්ධනය වෙයි. එබැවින් කංසා වගාවකට වල් නාශක අවශ්‍ය වන්නේද නැත.

වියයුතු දේ

මේ වනවිට කංසා ශාකයෙන් වැඩ ගන්නා දියුණු රටවල් ඒ ඒ කර්මාන්ත සඳහා අවශ්‍ය කංසා ප්‍රභේද වෙන් වෙන් වශයෙන් වගා කරයි. ලෝකයේ දියුණුම රටවල් ශ්‍රී ලංකාව සමග එකතු වී කංසා වගා කිරීමට බලාපොරොත්තු වෙන අතර එහිදී සිදුවන්නේ ඔවුන් ගෙන එන ප්‍රභේද අප රට තුළ ඇති ඉඩම්වල වගා කර අස්වැන්නේ අවශ්‍ය කොටස් රැගෙන යාමය.

සමකය අසළ තිබෙන ශ්‍රී ලංකාව අතීතයේ සිට පෘථිවි සමාජයේ ගෞරවයට සහ ආදරයට පාත්‍ර වූයේ මෙරට තිබූ ස්වාභාවික සම්පත්වලට තිබූ ඉල්ලුම නිසාය. වසර පුරා දිනකට පැය දොළහක් සූර්යා ලෝකය ලැබෙන, මෝසම් සුළං දෙකකින් වැහි ලැබෙන, ඉතා වටිනා ජල පෝෂක කඳුකරයකින් යුක්ත සහ ගංගා ඇළ දොළ සපිරි මෙම භූමිය ලබා ඇති කීර්තිය තව දුරටත් වැඩි කිරීමටත් ආර්ථික අවපාතයෙන් ගොඩ එන්නටත් ජාත්‍යන්තර ප්‍රජාවට අවශ්‍ය කංසා සැපයුම ලබා දීමෙන් හැකිය.

ආචාර්ය වසන්ත සේන වැලිඅංග

සබැඳි වීඩියෝ –