News

බොරු ප්‍රචාරයක් ගෙන යනවා පොහොට්ටුවට වෙනත් ජාතීන්ගේ ඡන්ද අවශ්‍ය නැහැ කියලා අපි කිවුවා කියලා – විපක්‍ෂ නායක

ශ්‍රී ලංකා පොදුජන පෙරමුණට වෙනත් ජාතිකයන්ගේ ඡන්ද අවශ්‍ය නැති බවට ඇතැම් පුද්ගලයන් බොරු ප‍්‍රචාරයක් ගෙන යමින් සිටින බව විපක්‍ෂනායක මහින්ද රාජපක්‍ෂ මහතා අද (5) පැවසීය.

දේශපාලනය කරන කිසිවෙක් තමන්ට වෙනත් ජාතිකයන්ගේ ඡන්ද අවශ්‍ය නැති බවට ප‍්‍රකාශ කරන්නේ නැතැයි ද ඔහු කීය.

එහිදී විපක්ෂනායකවරයා දැක් වූ අදහස්….
මේ දිනවල බොරු ප්‍රචාරයක් ගෙන යනවා අපි කිවුවා කියලා ශ්‍රී ලංකා පොදුජන පෙරමුණට වෙනත් ජාතීන්ගේ ඡන්ද අවශ්‍ය නැහැ කියලා. දේශපාලන පක්‍ෂයකට ඡන්ද අවශ්‍ය නැහැ කියන පුද්ගලයින් ඉන්නවාද? දේශපාලන පක්‍ෂයකට සෑම ජාතියකම, සෑම ආගමකම ඡන්ද අවශ්‍යයි. පක්‍ෂයක සෑම ජාතියක්ම, සෑම ආගමක්ම නියෝජනය කරන අය ඉන්නා බව ගරු විපක්‍ෂ නායක මහින්ද රාජපක්‍ෂ මැතිතුමා පවසයි.

ගරු විපක්‍ෂ නායක මහින්ද රාජපක්‍ෂ මැතිතුමා ඒ බව පැවසුවේ විද්වත් වෘත්තිකයින්ගේ ප්‍රධාන කාර්යාලය වන පවුර ප‍්‍රධාන කාර්යාලය හා එහි වෙබ් අඩවිය විවෘත කිරීමේ උත්සවයට අද පෙරවරුවේ එක්වෙමිනි. මෙම කාර්යාලය නුගේගොඩ පිටකෝට්ට පාරේ සියපත ගොඩනැගිල්ලේ දෙවන මහලේ පිහිටා ඇත.

වැඩිදුරටත් අදහස් දැක්වූ මහින්ද රාජපක්‍ෂ මැතිතුමා රටේ අනාගතය ගැන මෙන්ම සමාජ, ආර්ථික ප්‍රශ්න ගැන බැලුවාම රටක් අවුරුදු 04ක් තුළ මෙහෙම විනාශ කළ හැකි දැයි කියා සිතෙනෙවා. ප්‍රශ්න වලින් මඟ හරින්න ආණ්ඩුව දවස ගානේ අලුත් ප්‍රශ්නයක් මවනවා. පසුගියදා සිදු වූ සිදුවීමත් සමඟ රටට වගේම කිසිම ජාතියකට ආරක්‍ෂාවක් නැහැ. සිංහල, දෙමළ, මුස්ලිම් සෑම ජාතියක්ම අනාරක්‍ෂිත තත්වයට පත්වෙලා. තාත්තට පාසලට ගිහින් තම දරුවා පාසලෙන් ගන්න බැරි තත්වයක් උදාවෙලා. ළමයා ගන්නගිය තාත්තට වෙඩි තියලා මරනවා. එවැනි තත්වයක් රට තුළ උදාවෙලා. ජාතීන් අතර සැකය ඇතිවෙලා. රටක් ඉදිරියට යන්න අරමුණක් තිබිය යුතුයි. 2005දී ජනතාව අපෙන් ඉල්ලුවේ යුද්ධය අවසන් කරදෙන ලෙසයි. වසර 30ක් තිබූ යුද්ධය වසර තුනහමාරකින් අපි අවසන් කළා. ඊළඟට තිබුණේ සංවර්ධනය ආරම්භ කිරීමයි. අපි එයත් කළා. වසර 30ක් යුද්ධයෙන් බැට කාපු උතුරු නැගෙනහිර පළාත්වලත් යටිතල පහසුකම් ගොඩ නගමින් සංවර්ධනය කළා.

අද රටට විවිධ බලපෑම් එන්න පටන් අරගෙන. විවිධ ගිවිසුම් වලින් රට පාවා දෙන්න හදනවා. සෑම අමාත්‍යංශයකටම පිටරැටියන් ඇතුළුවෙලා. පාර්ලිමේන්තුවේ ප්‍රථම වාතාවට ඇමරිකානු ඩොලර් වලින් පඩි ලබන නිලධාරීන් පත්කරගෙන. මැතිවරණ කොමසාරිස් කාර්යාලයට, අල්ලස් දෙපාර්තමේන්තුවට මෙන්ම රටේ අනෙකුත් ආයතන වලටත් විදේශකයින් ඇතුල් වෙන්න පටන් අරගෙන. එවැනි වෙලාවක අපේ රටේ උගතුන් විද්වතුන් හා වෘත්තිකයින් වැනි රටට ආදරය කරන පිරිසක් මෙවැනි සංවිධානයක් ගොඩනගාගෙන ජනතාවාදී ආණ්ඩුවක් පිහිටුවීමට මුල්වීම ගැන අපි සතුටු වෙනවා. අපේ ගමන අතරමඟ නවත්වන්නේ නැහැ. සියලුදෙනා එකතු කරගෙන මෙම ආණ්ඩුව පලවා හැරීමට කටයුතු කරනවා යැයි මෙහිදී වැඩිදුරටත් පැවසීය.

මෙම අවස්ථාවට පාර්ලිමේන්තු මන්ත්‍රීවරුන් වන ඩලස් අලහප්පෙරුම, ගාමිණි ලොකුගේ, පවුර විද්වත් වෘත්තිකයින්ගේ සංගමයේ සභාපති එස් අමරසේකර, ලේකම් එස් ලියනගම යන මහත්වරුන්ද එක්වූහ.