නිරෝධායන ඇඳිරිය පනවන්නැයි ඉල්ලීමක්

වැඩි වශයෙන් කොවිඩ් ආසාදිතයන් වාර්තා වීම නිසා කෑගල්ල දිස්ත්‍රික්කයේ ආසාදිතයින් වැඩි වශයෙන් වාර්තා වන ප්‍රදේශ සඳහා නිරෝධායන ඇඳිරිනීතිය පනවන්නැයි කෑගල්ල දිස්ත්‍රික් ලේකම් මහින්ද එස් වීරසූරිය මහතා ඉල්ලීමක් කර ඇත.

අද (01) වනවිට කෑගල්ල දිස්ත්‍රික්කයේ කොරෝනා ආසාදිතයින් 104 දෙනෙක් වාර්තා වී ඇතැයි ද ඔහු සඳහන් කරනවා. තවද ආසාදිතයින් 26 දෙනෙක් මාවනැල්ල ප්‍රාදේශීය ලේකම් කොට්ඨාසයෙන් වාර්තා වන බව ද පැවසේ.

“ඒ වගේම බුලත්කොහුපිටිය ප්‍රාදේශීය ලේකම් කොට්ඨාසයෙන් 14 දෙනෙකුත්, කෑගල්ල ප්‍රාදේශීය ලේකම් කොට්ඨාසයේ 15 දෙනෙක් හා දෙහිඕවිට ප්‍රාදේශීය ලේකම් කොට්ඨාසයෙන් 12දෙනෙකු වශයෙන් ප්‍රධාන වශයෙන් අපිට වාර්තා වෙලා තියෙනවා. බුලත්කොහුපිටිය සහ මාවනැල්ල කොට්ඨාසවල ප්‍රාදේශීය සභා සභාපතිවරුන්ගෙන් අපිට ඉල්ලීමක් ආවා තත්ත්වය ටිකක් ව්‍යාප්ත වෙලා යන තත්ත්වයක් තියෙන නිසා නිරෝධායන ඇඳිරිනීතිය පනවමු කියලා. අපි ඒ සම්බන්ධව මේ වන විට ජාතික කමිටුව සඳහා හා ආණ්ඩුකාරවරයාගෙන් ඉල්ලීම් කරලා තියෙනවා. ඒ සම්බන්ධයෙන් අවශ්‍ය තීරණ ඉහළ මට්ටමින් ගනී කියලා අපි බලාපොරොත්තු වෙනවා. පොලීසියෙන් ඉල්ලීමක් කළා ගම්පහ දිස්ත්‍රික්කයෙන් මේ සීමාවට එන පිරිස සීමා කරන්න වැඩපිළිවෙලක් ගන්න කියලා. ඒ වගේම දිස්ත්‍රික් කමිටුවෙන් අපි ගත්තා සියලුම නිවාඩු නිකේතන සහ නවාතැන්පොළවල් වසා තැබීමටත් තීරණයක්. ඒ වගේම නිරෝධායන ප්‍රදේශ සහ රෝගීන් වැඩිවශයෙන් වාර්තා වු ප්‍රදේශවල සතිපොළවල් පැවැත්වීමත් නැවත දැනුම්දෙන තුරු තාවකාලිතව අත්හිටුවීමටත් කටයුතු කළා.“ යනුවෙන් කෑගල්ල දිස්ත්‍රික් ලේකම් මහින්ද එස් වීරසූරිය මහතා සඳහන් කරනු ලැබුවා.